Open Day

Di dla porta davierta tl Lizeum d’ert “CADEMIA” y tla Scola prufesciunela “LA PRUFESCIUNELA”per l artejanat artistich de Urtijëi

Ai 30 de nuvëmber 2024 à l Lizeum d’Ert “CADEMIA” y la Scola prufesciunela per l artejanat artistich “LA PRUFESCIUNELA” de Urtijëi giaurí la portes a duc i sculeies dl dauní, a duc i genitores curiëusc y a duc i apasciunei dl ert.

I vijitadëures ova l mesun de vijité la tlasses y la berstotes de tramdoi scoles y se goder la gran puscibliteies y i vantajes dla cin’ sezions che vën pitedes. La truepa materies pratiches dal dessëni al mudelé, dal depënjer al ziplé, dal design a la grafica mustrova sculeies che laurova sun uni sort de creazions, tecniches y opres. La creatività straordinera y la gran mutivation di sculeies a fat a duc marueia.

Lepró fova sculeies che menova la jënt tre la scoles, dajan nfurmazions sui lëures desferenc y sulla maniera dl lauré de nosta scoles. L Lizeum d’Ert y la Scola Prufesciunela ne ie nia me scoles che nsenia l’ert o tecniches uniches tradizioneles de nosta valeda, ma les ie scoles che pieta na istruzion moderna y atuela. Danter la materies artistiches veniel enghe nseniá materies teoriches y adum pietles na fundamënta perfeta per na furmazion personela y prufesciunela.

L artejanat y l’ert fesc pert de nosta cultura y nosta scola gëura la stredes y artën nosc jëuni.