Jan
10
Liejer deplù
Tradiziunel defrënt, paritetich y urientá de viers al daunì
L Lizeum d'ert Cademia pieta na ufierta lergia tl ambit artistich y dà l mesun de mparé sciche l toca truepa tecniches de lëur y ert ti lauratueresc. L dà l mesun de arjonjer cunescënzes y cumpetënzes spezifiches, cossa che porta pro a pudëi mëter man n stude academich y se crì n troi prufesciunel tl ciamp dl'ert.
L Nseniamënt njuntà (ZLA), de doi ëures al'ena, dà l mesun de nsenië aldò de tematiches y de proiec tl ciamp de ert y mujiga.
Canche l ie unida a se l dé la reforma dla scoles autes, ie l Lizeum d'ert Cademia da una na pert jit plu sot tl aspet de formazion generela, dal'autra pert al mantenì si urientamënt tradiziunalmënter sterch tla materies artistiches cun lezions ti lauratueresc. Chësc fej dl Lizeum d'ert de Urtijëi zeche ora dl solit tla cuntreda scolastica dl Südtirol.
Carateristich per la scola tla localiteies ladines ie nce l sistem paritetich cun nseniamënt tl lingaz tudësch y talian. L lingaz ladin ie n arichimënt sëuraprò per l urientamënt plurilinguel dla scola. Nglëisc vën nsenià coche lingaz fulestier, y tl trienium iel nce lingaz de nseniamënt per cuntenuc desvalifs (nseniamënt CLIL).
L Lizeum d'ert ti dà la priorità al stude de manieres udëi l'estetica y ala creazion artistica. L juda pro a se dé ju cun svilups dl'ert tres la storia y cun opres d'ert relevantes. L ti dà la puscibltà ala sculees y ai sculeies de comuniché tres l'ert se nuzan de na gran lingia de mesuns.
L troi de formazion pea via dal dessenië, schizé, depënjer y passa tres la creazion plastica per ruvé ala realisazion tl ntëurvia. Se dé ju cun la teoria di culëures, dla perzezion y dla perspetiva, cun i elemënc de basa dla rafigurazion grafica, pitorica y dla scultura nsci coche ti giaté l fortl a lauré cun i media moderns y mparé tecniches tradiziuneles y modernes, porta pro che la sculees y i sculeies sibe boni de dé na esprescion aldò a si idees.
La lezions vën mpartides ite, coche bele dit, do l model paritetich, pra chël che mesa la materies vën nseniedes per tudësch y l'autra meses per talian. Na cunescënza aldò di lingac tudësch y talian pieta nsci na bona premissa, nce sce l vën regularmënter pità sustëni linguistich a scola.
La ufierta formativa se slergia ora sun cater dis y mez al'ena cun lezions dut l di (ena de cin' dis cun lezions cater iedesc domesdì) y vëij dant enes de pratica tla 3ª y tla 4ª tlasses, la cunlaurazion cun ënc culturei publics y privac, coche nce la partezipazion a cuncorsc desvalifs.
