Mostra dla Scola Prufesciunela per l artejanat artistich

Mostra dla Scola Prufesciunela per l artejanat artistich de Urtijëi

Vernissaja: n mierculdi, ai 14.05.2025 dala 12.00

Orar dla mostra: uni di dala 10.00 -12.00 y 16:00 - 19:00

Nosta scola mët a jì chëst ann na mostra tl Circolo Lia Mostra d’Ert y ti dà nsci la ucajion ala studëntes y ai studënc de mëter ora i resultac de si lëures fac ntan l ann de scola 2024/25, sibe tla scultura tl lën y tla decurazion pitorica, coche nce tl dessëni, tla proietazion y tl mudelé tla mauta. Da udëi iel nce lëures fac sun computer tla materia de Aplicazion di media nueves. Sëuraprò iel da udëi lëures ziplei dala jëunes y dai jëuni dl Curs de spezialisazion de scultura.

Tres i lëures d’uni sort ulons ve dé na idea de chël che nosta scola pieta, per ti dé a nosta sculées y a nosc sculeies l mesun de lascé luné tres y demustré si talënt.

Tl nseniamënt dla Scola Prufesciunela per l artejanat artistich vën valorisedes la cumpetënzes tradiziuneles dl artejanat, la cunescënzes tecniches, la criatività artistica y nce la inuvazion.

Chëst ann ie nce unida abelida la vedrina dla sala d’esposizion cun n lëur lià ala tematica anuela dla scola, che fova chël dl „Mond dl'eghes“. Tl scumenciamënt fova la idea chëla de reprejenté na gran onda che va tres la vedrina, n tòch dedora y n tòch dedite. La realisazion ie unida data su ai sculeies de duta la materies artistiches, design multimediel, ert figurativa y ziplé. Do la prima schizes à un n cunzet riesc plajù bëndebò: na gran onda cun criatures dl'ega, che dajova la puscibltà de lascé tò pert truep sculeies a chësc proiet ntan la materies pratiches.

Davia che chësta idea fova de doi mutans dla 5a tlas, ieles chëstes unides numinedes coordinadëures che judova pea pra chësc proiet. Si ncëria fova chëla de coordiné duc i partezipanc, de dé istruzions tleres y de dé na forma a dut l pruzes dl lëur. Nscila ales pudù fé esperienzes tl Project management y n cont dla ncëria da Project manager.

Cun chësc proiet ne à i sculeies nia mé miurà si cumpetënzes tecniches y artistiches, ma i à nce fat esperienzes pratiches n cont dla planificazion y la realisazion de n proiet.