Vijita de na delegazion da Viena tl Lizeum d'ert y tla Scola prufesciunela per l artejanat artistich

Ai 10 de fauré dl 2026 ons abù l plajëi de saludé te nosta doi scoles l cuordinadëur dla Repartizion Istruzion y Furmazion de Viena dut. Arno Langmeier, l diretëur dla Repartizion Aministrazion dla scola y cultura ladina dut. Mathias Stuflesser, l cunlauradëur dut. Stefan Graziadei y la diretëura dl Ciamp pedagogich dut.a Maria Kostner, che ie unic a nes vijité.

Ntan l'ancunteda à la dirigënta de scola dut.a Maria Teresa Mussner auzà ora nosta ufierta de furmazion che ie unica tl Sudtirol: la truepa sezions, da chëla de Design, de Grafica y de Ert figurativa tl Lizeum d'ert a chëla de Scultura tl lën y chëla de Depënjer tradiziunel, nduré y pitura decurativa tla Scola prufesciunela per l artejanat artistich.

Dantaldut à l ghest da Viena demustrà n gran nteres per nosta realtà coche scola plurilinguela paritetica y per la mpurtanza de na didatica sensibla ai aspec linguistics. Nce l cunzet dl mparé te na maniera autonoma (IUMA) à descedà n gran nteres.

Dadedò à i vijitadëures pudù fé na vijita tres i lauratueresc de tramedoi scoles, acumpaniei da doi nsenianc de materies artistiches. I à nsci abù la ucajion de udëi l lëur pratich y de sentì l'atmosfera criativa che caraterisea la vita da uni di te scola.