Simulazione dell'Esame di Trilinguismo Ladino

Simulazion dl Ejam de Trilinguism ladin

D’auril à l Ciamp pedagogich per la scoles ladines deberieda cun l Servisc per l Ejam de Bi y Trilinguism urganisà simulazions dl ejam de ladin tla scoles autes dla Val Badia y de Gherdëina.

Truep sculeies, dantaldut dla 3ª y 4ª tlasses, à ulù tò pert. N pudova se crì ora l livel: A2, B1, B2 o C1.

Per scumencé ons scrit ntan la lezions de Ladin a scola la pert scrita: na e-mail, n ressumé y/o na minonga y nce la loces pra n test curt da mplenì cun la parola plu passenënta.

Ai 16 de auril ie unic te scola la ispetëura Claudia Rubatscher, la respunsabla di Ejams Claudia Picus y si cunlauradëura per nes splighé dut cie che ie de utl savëi sun l Ejam.

Do iel unì fat la proa a usc cun i trëi cumisseres per l Ejam. On giapà n test plu lonch per ladin. An 10 menuc per l liejer a puntin y se njenië al purté dant ai cumisseres. Dopro ans n 10 menuc per se prejenté n iede n curt, rujené dl test liet y respuender a vel’ dumanda.

A uni sculé*a ti à i cumisseres dat n feedback sun l lëur scrit che l*a à fat y do nce sun la proa a usc. Oradechël à i cumisseres spligà cie che n pudëssa fé miec y vel’ regules ortografiches y gramaticheles.

Davia che l fova l prim iede che vel’ dadedel vën fat, à vel’ sculé messù aspité plu giut dan pudëi dé ju l ejam a usc. Ma son a una che l ie stat de utl purvé ora tl cuncret a fé chësc ejam per l cunëscer miec y nsci per vester mancul grams canche n se scrij ite al reél.

N valgun sculeies dl Lizeum d'ert Cademia y si nsenianta G. Mussner